Новости Камчатки на корякском языке за 11.09.2020 г.

11.09.2020 08:59:58 (GMT+12)

Новости Камчатки на корякском языке за 11.09.2020 г.
В. Солодовынак чинин йичичг'энин метке накояваӈвоӈнав' г'иӈытг'ымайпинӈу лэйвылг'э автобусык краевой гынунык, йинв'аняваннэн г'уемтэв'илг'у то инэнлэйвычг'ын.

"Уйӈэ атвака в'аняванӈын, тит кытаван нанг'ыявайкынав' г'иӈытг'ымайпинӈу? Кытаван ныг'итики, в'утиныкъйит тыетэйкыӈын тайкыёлӄыл",- эвыӈ В. Солодов йинв'аняванма инэнлэйвылг'ын.

Ынан тывынэн, эмен ӄуччев' кыг'анӄанӈыволаӈ явак чининкинэв' инанвийиӈу тит атг'ылӈывока, эмет в'ача коӈволаӈ кыӈэв'читык.

В. Солодов эвыӈ эмен,гамгаавтобусык ӄонпыӈ  еллайке энанчечг'атгиӈо. Ӈэвэӄ лэйвылг'э ӄыйим ыннявайкынав' айпинӈу, ычгынан нэевилэтикынэв' штрафо, то опта инэнлэйвылг'э, мыев' коччелӈывоӈнэн аваломкылг'энав' лэйвылг'у.

*

В'уйвык Озерновский то Запорожье нэтэйкын ЧС. Тайкыён, тит ныг'итики ЧС калинин инэллэчг'э в'утин районык.

ЧС нэтэйкын, мыев' ӈанко эмет ӈыволай тыг'ылӈывок аӄачыг'ычгиӈа 63 г'уемтэв'илг'у. Ӄуччев' келлаӈ тыг'ылпеннилг'о, ӄуччев' эмет котг'ылаӈ COVID-19.

*

Ымыльг'ыӈ нэпъйигэг'ын ёнатылг'ыйикыӈ Камчаткак улвыгиӈо яяк. Ымыӈ ынпычг'у эмэлкэ нэлейвыткуйкынэв'. Ынниг'ан валг'ын тайкыён такалиӈнин пыче итылг'э инэллэчг'у крайик В. Солодовынак.

Энанг'отав'гиӈо паёчалай ятылг'ыйикыӈ Камчаткайтыӈ вэтатынвэтыӈ. Паненячг'энаӈ ятвалайке карантинык ӈыччеӄ неделят. То Камчаткак амъел наяявайкынав' г'иӈытг'ымайпинӈу то йилгылилив'. Еппы ӄыйим нывэтатэкынав' кинотеатрав', инэнкычвильг'этвано. Яӈволаӈ вэтатык титэ явэтгыльг'аллаӈ иччетык Роспотребнадзор, миӈкые вэтатык, титэ еппы эплипъйике энанг'отав'гиӈо.

*

Нымэлӄин кытгемгиӈын китыӈ эняччыгиӈо аӄачыг'ычгиӈыӈ COVID-19 - гаяйтаӈӈывота увикив'.

Ӄонпыӈ ганмытӈывота мынго, мылата конмыӈнэн ымоӈ микробав'.

Гаяваӈвота г'иӈытг'ым айпиньӈу то ыннеӈчеӈ эпылг'о йилгылилив', тит увикив' яйтаӈык то ӄуччев' атг'ылпэнника.

Ӄонпыӈ ганмытӈывота мынго антисептиката кымг'ылэма вэлиткояӈӄо, лайвыгиӈыӈӄо.

Кытыл чеймык итке ӄутин г'уемтэв'илг'ык 1,5 - 2 метрав', титэ миӈки котваӈволатыӄ  ӈэвэӄ ӈынвыӄ г'уемтэв'илг'у котвалаӈ.

Эчгыпо йинчоччымав'нэн С. Тынанто.

Эчгыпо Камчаткакенав' чав'чываеличг'энаӈ 10.09.2020 г.: https://poluostrov-kamchatka.ru/pknews/news/detail.php?ID=279191

Делитесь новостями Камчатки
в социальных сетях:

Свежие новости Камчатки, новости Петропавловска-Камчатского