Новости Камчатки на корякском языке за 22.08.2020 г.

22.08.2020 09:15:03 (GMT+12)

Новости Камчатки на корякском языке за 22.08.2020 г.
Яйгочав'ӈыиччетылв'ыну Камчаткакенав' чоччымав'лай ӈывок нытуйӄин яйгочав'ӈыгэвэгиӈын. 1 льгичейпыйиг'илгык паненячг'энаӈ яӈволаӈ вэтатык инэнгыюлэв'вано, ятан ымыӈ ею еллайке тывылг'о Роспотребназора. Эмэлкэ яйгочав'ӈыгиӈо наяӈвоӈнав' ӄутин  яйгочав'ӈыиччетылв'ынык меӈию наколӈыӈвоӈнав' ВУЗо, СУЗо, то энангыёлав'гиӈо миӈки кенӈыволаӈ инэгэю итылг'у яйгочав'ӈыгиӈо. То ымыӈ ею опта амъел ятвалайке тит увикив' яйтаӈык.

Ынниг'ан валг'ын танвэтгыӈгиӈын нэкмитын омакальг'анма, тит амъел иткэ ныг'итикын тыг'ылгиӈын аӄачыг'ычгиӈа. В'уччин умекет йиллэнин В. Солодовынак.

"30 ӈывома алайиг'илгын нэкминэв' нытуйӄинэв' этгиӈо ӈывок вэтгиӈо яйгочав'ӈыиччетылв'ынин. Эмет ыччу ковэталаӈ то еллайке кытаван пылиткойтыӈ 2020 г. Ыннею этгиӈо келлаӈ тилик яӈъя валг'о этгиӈо яйгочав'ӈыиччетылв'ынэ. Инэллэчг'э энангыёлав'гиӈэпыӈ РФ нив'нэв' регионо, тит чинин навэтгыльг'аннав' титэ ӈывок нытуйӄин яйгочав'ӈыгэвэгиӈын.- эвыӈ пыче итылг'ын инэллэчг'у энангыёлав'гиӈэпыӈ крайик А. Короткова.- Алайиг'илгык то ӄайчейпы ненчичг'энав' то нэкминэв' чоччымав'гиӈо гамга яйгочав'ӈыиччетылв'ынин крайик ӈывок яйгочав'ӈыгиӈо. В'отэнг'ылойтыӈ ымоӈ яйгочав'ӈыиччетылв'ыно ганчоччымав'лэнав' вэтатык".

Ынно эвыӈ, тойчыг'ычг'энаӈ вэтанма гамга классэн ныг'итикынэв' яӈъя валг'о вано. Ятан вано миӈки накойилӈывоӈнав' яйгочав'ӈыгиӈо химияӈӄо, технологияӈӄо паненячг'энаӈ еллайкэ.

В'отэныӈӄо калэяк, миӈки еӄӄым ӈынвычгаё кымиӈу яӈволаӈ вэтатык ӈыеӄэв'кинэв' сменав'. То опта, миӈки ӈынвыӄ калэйтылг'о,  аму наяӈвоӈнав' ӄуччев' уроко йилык дистанционный этгиӈэпыӈ. Еллайкэ энанг'отав'гиӈо тэйкык омакальг'атгиӈо то ӄуччев' имыяӄ омакаӈ валг'о этгиӈо.

В'уткекъйит Роспотребнадзорык эв'лай эмэлкэ линейкав' тэйкык ангытыкьет ӈывома нытуйӄин яйгочав'ӈыгэвэгиӈын ӈайӈынок. Ятан ӄонпыӈ увикив' нанг'ыяйтаӈэкынав'. Ӈэвэӄ нымэлӄин ӈайӈын ятвайкэ эмэлкэ линейкав' ынтэйкынэв' 1, 9, 11 классык.

"Мойкыӈ келлаӈ яноткенав' чаткаёӈгиӈо - йилык нымэлӄинэв' энангыёлав'гиӈо, лиги лыӈма увикив' яйтаӈык. - эвыӈ В.Солодов.

Тит антг'ылӈывока, ымыӈ ею нэетэйкикынэв' яйгочав'ӈыиччетык Камчаткак. Ымыӈ ею ӄонпыӈ наянмытатэкынав', то нув'тамг'ав' нэегитэйкынэв' ымоӈ вано итылг'у яйгочав'ӈыиччетылв'ынык. Опта ялӄэв'ма нэегитэйкын температуран.

Эчгыпо йинчоччымав'нэн С. Тынанто.

Делитесь новостями Камчатки
в социальных сетях: