Новости Камчатки на корякском языке за 03.09.2020 г.

03.09.2020 09:09:10 (GMT+12)

Новости Камчатки на корякском языке за 03.09.2020 г.
Кумэлтывиӈ этгиӈын аӄачыг'ычгиӈыкъет. В'уткукекъйит нэпъйинэв' электронный калитг'улу меӈинэтэ колайвылаӈ Камчаткаӈӄо етылг'у в'уткые ӄотэннотаӈӄо.

"Виткукинаӈӄо льгичейпыйиг'илгык нэпъйинэв' электронный калитг'улу меӈию янот накояваӈнав' етылг'э тит лэйвык Камчаткаӈӄо, - эвыӈ инингив' Инэллэчг'ин Инэллэиччетык Камчатский крайик Р. Василевский.

Вагалынык амъел ковэтатыӈ ваны миӈки накотайкыӈвоӈнав' тестав'. В'утку гайматылг'а нэкунчичг'энӈыгэв' увикив' аӄачыг'ычгиӈыкъет, лыӈылг'ын COVID-19.

Ӈывома аӄачыг'ычгиӈын Камчаткак ӈывой итык этгиӈын тит в'уткые йиччилык етылг'у пропуската. Янот эмэлкэ ныетикынэв' ӄотэннотаӈӄо вэтатынвэтыӈ, ямкэчэйтыӈ, меткэ ӄайтумгу. Ыннею калитг'улу, тит эмэлкэ лэйвык в'утку эллай тит эеткэ нэнг'ынтикын аӄачыг'ычгиӈын.

*

1 льгичейпыйиг'илгыӈӄо паёчатэ ыннэн малав'ъян, миӈкые накоёӈнав' аӄачыг'ычгиӈылг'о. Ыннин китыӈ малавъян 2 Петропавловскак - Камчаткакен.

Ӄуччев' инэнмэлэв'вано паненячг'энаӈ ковэталаӈ. То ӄонпыӈ гачоччымав'лэнав' гымлэ ӈывок вэтатык госпиталё, ӈэвэӄ яӈвоӈ ӈывок нытуйӄин тылг'ылгиӈын COVID-19.

Нэнтэг'итвэннэв' госпиталё, мыев' кив'тылытвэтыӈ тыг'ылгиӈын аӄачыг'ычгиӈа COVID-19.

Титэ эллай ӈынвычгаё тыг'ылпеннилг'о COVID-19, ӈыволай вэтатык 8 инэнмэлэв'ъичету Камчаткакенав'. Эллай 816 йилӄынво, миӈки наӈвонав' йинмэлэвэтык аӄачыг'ычгиӈылг'о.

*

Нымэлӄин кытгемгиӈын китыӈ эняччыгиӈо аӄачыг'ычгиӈыӈ COVID-19 - гаяйтаӈӈывота увикив'.

Ӄонпыӈ ганмытӈывота мынго, мылата конмыӈнэн ымоӈ микробав'.

Гаяваӈвота г'иӈытг'ым айпиньӈу то ыннеӈчеӈ эпылг'о йилгылилив', тит увикив' яйтаӈык то ӄуччев' атг'ылпэнника.

Ӄонпыӈ ганмытӈывота мынго антисептиката кымг'ылэма вэлиткояӈӄо, лайвыгиӈыӈӄо.

Кытыл чеймык итке ӄутин г'уемтэв'илг'ык 1,5 - 2 метрав', титэ миӈки котваӈволатыӄ  ӈэвэӄ ӈынвыӄ г'уемтэв'илг'у котвалаӈ.

Эчгыпо йинчоччымав'нэн С. Тынанто.

Эчгыпо Камчаткакенав' чав'чываеличг'энаӈ 02.09.2020 г.: https://poluostrov-kamchatka.ru/pknews/news/detail.php?ID=278934

Делитесь новостями Камчатки
в социальных сетях:

Свежие новости Камчатки, новости Петропавловска-Камчатского