Новости Камчатки на корякском языке за 06.08.2020 г.

06.08.2020 06:00:18 (GMT+12)

Новости Камчатки на корякском языке за 06.08.2020 г.
Петропавловскак- Камчаткакен йиг'ояв'лаӈ мыллыӈэн спортакенав' вано. Ыннею вэтгиӈо наяӈвоӈнав' тайкыёлӄылэпыӈ "Городкенав' ёнатгиӈо". Тайкыён ӈывонэн пыче итылг'э инэллэчг'у Камчаткак В.Солодовынак яйнама 280 гэвэгиӈо Петропавловскаӈ - Камчаткакен.

" Эмет нэлэг'унэв' вано, миӈки наяӈвоӈнав' тэйкык спортакенав' ымыӈ ею. Ымыӈ пылв'ынто котвалаӈ, эчги накончоччымав'ӈынав' калив' тит ӈывок вэтатык,- эвыӈ пыче итылг'ын инэллэчг'у миӈки спортакенав' этгиӈо накогетаӈвоӈнав' Камчатский крайик К. Хмелевский.

Ӄулин нэейкуйӈынэв' явэнаӈо, тит гайматылг'о ымыӈ ныг'итикынэв' спортак то физкультурный этгиӈык.

*

Итылг'э "Ыннэнвалг'ын Россия" партийный тайкыёлӄылэпыӈ "Ваяткен энанчечг'атгиӈын", нэгитэн гынункин инэнвилиткув'ваны
Елизовык. Ычгынан нэгитэнэв' миӈкые накояйтаӈӈынав' увикив' тит атг'ылӈывока аӄачыг'ычгиӈа. Метке накояв'аӈнав' вилиткуӈэвэ ымыӈ г'иӈытг'ымайпинӈу то йилгылилив'. Янот ыччу ёг'ыма, ӄутиныйик уйӈэ аявака ымыӈ ею тит атг'ылпенника. Нанъеёлав'нав' ыччу, тит ӄонпыӈ ынъявайкынав' г'иӈытг'ымайпиньӈу то йилгылилив'.

В'утин энанчечг'атгиӈык уйӈэ элэг'уке нэнтынэв' ӈаеё меӈиныйик аявака ымыӈ ею тит атг'ылӈывока аӄачыг'ычгиӈа. Ымыӈ вилиткулг'э утгыкэ нэкуйкуйӈынэв' айпинӈу то йилгылилив'. Вэлатгиг'ын ынэн г'иӈытг'ымайпинӈин китыӈ 10 рублив'.

Инэллэчг'ын тайкыёлӄылэн М. Фунтикова эвыӈ, ынниг'ан валг'о йичечг'атгиӈо нымэлӄинэв'. Янокенав' чаткаёӈгиӈо кенӈыволаӈ тит ваята антыгэватка вийиӈык увикив' тит атг'ылпенника нэнг'ынтынэв'. Ӄонпыӈ лиги лыӈык еппы котвалаӈ энанг'отав'гиӈо аӄачыг'ычгиӈыкъет. "Ныв'ийитг'амг'ав' нытвайкынав' юнэтылг'у, миӈки ӈывычгаё г'уемтэв'илг'у комакалаӈ. Инмы эчги Камчаткак котаг'этвелаӈ аӄачыг'ычгиӈылг'у, эв'ынчам увикив' гаяйтаӈӈывота. То вэтатылг'эн майӈывэлиткованык ымыӈ ею ныг'итикынэв' тит атг'ылӈывока",- эвыӈ ынно.

Эчгыпо ганчоччымав'лэнав' С. Тынанто.