10.12.2020 12:27:32 (GMT+12)
Льгиэӈг’элу лыӈылг’ытую юнэттумгу, юнэтылг’у Корякский округык!
Тыкив’ӈынэв’ нэчгыӄэнав’ лэӈлэӈыӈӄо поздравленияв’ 90 гэвэгиӈыкъет титэ гантоӈвав’лэн Корякский округык!
Корякиян- ынанмитг’айин ваны Россиякен, тыттэль ныпыттоӈӄэн митг’а умкылв’ынэ...Яноткен пытоӈгиӈын - ваят. Ныкетгуӄинэв’, ныпыллыӈӄэнав’, нымитӄинав’ имы яӄэпыӈ, нэӈг’элӄинэв’ чининкинаӈ нотаӈ!
Вагиӈын округэн- вагиӈын гамгаӄояв’ъепылг’эн, ынныӈийтылг’эн, тагийниӈылг’эн, геологын,таяӈылг’эн, инэнмэлэвылг’ин, инэнгыюлэвылг’ин, вэтатылг’эн культурак.
Ыявак Корякский округыӈӄо лиги нэкулӈыӈнэв’ Пыллыӈылг’о Социалистический Вэтгиӈэпыӈ, котваӈ «Эӈг’элу лыӈылг’ын юнэтылг’ын Камчатский крайик» Н. И. Тынетегин, ӈыечгэйи «Лиги лыӈылг‘ыт ӄояв’ъепылг’ыт»- Ю. М. Нинвит то А. А. Акеев.
Нымэйиӈӄинэв’ вэтгиӈо накотайкыӈвоӈнав’ вэтатылг’а культурак, тит яйтаӈык айгытӄываятэн чининваяткенав’ этгиӈо. Опта гымаллай калимитычг’у :Кецай Кеккетын, Владимир Коянто, Кирилл Килпалин то вэтатылг’о искусствакенав’. Лиги нэкулӈыӈын В.В. Крупина.
Ӈынвоӄ Корякияк котвалаӈ г’уемтэв’илг’у, меӈиныйик нангычголав’нав’ культуракенав’ пыттоӈо,то нэнгыйивэннэв’ мылаво, аӈаӈъяв’ ӄутин нутэк Россияк, то томнотак.
Янот тыттэль ӈынвыӄ вэталлай тит йинымкавык вэтгиӈо промышленностяк, тэпичгыӈгиӈык, ынныӈийтыгиӈык, майӈанӈывой экономика.
Эчги Корякияк котаяӈӈыволаӈ, нэкутэйкыӈнэв’ йиг’это то ӄуччев’. Ыннею вэтгиӈо келлаӈ яёг’ыӈкы федеральный то краевой государственный тайкыёлӄыло. Ымоӈ ыннею тайкыгиӈо келлаӈ йиплэпавык то йингычголавык ёнатгиӈо округык.
Эчгикинэв’ тойваято опта котгыманӈыволаӈ ев’инненӈык тит нымэлӄинэв’ ёнатгиӈо ныг’итикынэв чининнутэк.
Гыммо тыкомычв’ынатыӈ, мучгин аӈг’алгиӈын мойик нотаӈ, гымвэтгиӈо яв’эннялаӈ йинув’татавык мучгин Корякский округ!
Мэйлу лыӈылг’ытую тумгу! Тойкыӈ ныг’итикынэв’ кытгэмгиӈо, нымэлӄинэв’ ёнатгиӈо, тит эӄлэткэ яӄыӈ, кытаван яёг’ыӈкы тэнмо! То гамга яйичг’ык ныюнэтикынэв’ ег’атгиӈо, мыяйгиӈо то аӈг’алгиӈыӈо!
Вячеслав Иванович Падерин,
пыче итылг’ын инэллэчг’у Корякский округык.
