В. Солодов: вийиӈык айгытӄываято - мучгин яноткэн чаткаёӈгиӈын

12.02.2021 07:48:16 (GMT+12)

В. Солодов: вийиӈык айгытӄываято - мучгин яноткэн чаткаёӈгиӈын

Инэллэчг’ын крайик йитг’этвылӈэти омакаӈ инанвийиӈылг’ык айгытӄываято Р. Долган.

Йитг’атвылӈыма натанвэтгыӈнав’ пыӈлов’ вийиныкъйит айгытӄываято.

«Гыммо тыкивыӈ, вэеӈгиӈо этгиӈэпыӈ айгытӄываятэн- яноткенав’ экономикакенав’ энаплэпавгиӈо крайик, тит нымэлг’эв’ нэюнэтикынэв’ айгытӄылг’у, яйтаӈма культуракенав’ пыттоӈо, историякенав’ этгиӈо. Гымкыӈ накокалэӈвоӈнав’ ӈынвыӄ айӈавыткогиӈо айгытӄываята, тыкивыӈ инэллэчг’э крайик ыннею вэтгиӈо ныкыттыг’ав’ нэнг’ыгитэйкынэв’»,- эвыӈ инэллэчг’ын крайик.

Опта ынно эвыӈ, ӈывонэн танвэтгыӈгиӈын, тит йинтоӈвавык законо айгытӄываятыкъет то миӈкые валг’о вэеӈгиӈо ныг’итикынэв’. Иви, мэллюлэӄ накончоччымав’ӈын закон, мыев’ ымыӈ ею нытгымг’ав’ нэкугитэӈнэв’ то омакаӈ айгытӄываятык накотанвэтгыӈнав’.

«Галалг’ыгэвэгиӈык эллай 1647 айӈавыткогиӈо, 65 нэннийнэв’ калив’, ӄуччев’ эллай энанъеёлав’гиӈо телефонэпыӈ. Айӈавыткогиӈык айгытӄылг’а натвынав’ пыӈлов’ ынныӈийтыгиӈэпыӈ, тагийниӈгиӈэпыӈ, энанмалав’гиӈэпыӈ, энангыёлав’гиӈэпыӈ. 2020 гэвэгиӈык уйӈэ иткэ эллай аӄайпыгиӈо айгытӄываятэн гэтама законо»,- иви Р. Долган.

Ымроссиякен энайилӈатгиӈэпыӈ 2010 гэвэгиӈык Камчаткак коёналаӈ 6640 чав’чывав’, нымылг’о, 2390 ительменав’, 1872 ӄоячмко, 1496 танӈо,1151 камчадалав’, 401 алеутав’, 14 эскимосов’. В’уткекъйит панэнатвылай эначгыпав’ъэччатыӈӄо Инэллэиччетин крайик.

Эняннимэв’нэн С. Тынанто.

Делитесь новостями Камчатки
в социальных сетях: