В. Солодов: айгытӄыӈӄал итылг’у районо крайик наяныплэпавэкынав’ омакаӈ

02.11.2020 09:17:11 (GMT+12)

В. Солодов: айгытӄыӈӄал итылг’у районо крайик наяныплэпавэкынав’ омакаӈ
Инэллэчг’ын Камчаткакен йитг’этвылӈэти омакаӈ юнэтылг’ык в’уйвык В’эемлэн Тигильский районык.

Мыкъян пыӈлов’ натвынав’ миӈкые валг’о таяӈгиӈо амъел еллайкэ, то титэ йиг’уевын нинг’ыӄин интернет.

«Айгытӄыӈӄал келлан ниччыӄинэв’ йинтыватгиӈо техникав’ тит ӈывок таяӈгиӈо. В’отэныӈӄо мыткев’лаӈ в’утин гивик ӈывок тэйкык фельдшерско-акушерский ваны. Мыев’ эчгикин пенин, интыватылг’ын 70 гэвэгиӈык. Мыткев’лаӈ уйӈэ ятан ив’кэ нэг’уев’нэв’ ФАПо, кымеӈыяв’- ымыӈ ею йиныплэпавык гамгав’уйвык. Эчгикинэв’ таяӈгиӈо В’эемлэк мыччекминӈынэв’ тит инг’э таяӈык ӄутин в’уйвык»,- эвыӈ В. Солодов.

В’эемлэк эмет нэплиткунэт ӈыччэк яят. Ӄымек нэкуплиткуӈын йинтыватык ФАП, эмет инэнмэлэвылг’у кочоччымав’лаӈ ялгытык.Ёнатылг’ыйикын Корякский округык опта нымейӈӄин чаткаёӈгиӈын китыӈ тит нэг’уевын нинг’ыӄин интернет.

«Ыннин китыӈ мойкыӈ яноткен тайкыён, тит ымыӈ ыявак нэг’уевын интернет. В’отэныӈӄо тынв’аняватын Президент РФ. Эмет келлаӈ тайкыёлӄыло. Ӈыччэк гэвэгиӈо наяяваӈнав’ тит кытаван Тэлличчайтыӈ нэнг’ытэйкын оптоволоконный этгиӈын»,-эвыӈ инэллэчг’ын крайик.

Йитг’атвылӈанма Президент РФ В. Путин омакаӈ В. Солодов натанвэтгыӈнав’ этгиӈо тит янот итылг’ын тайкыгиӈын кабель тит ныг’итики нымэлӄин интернет Анадырь- Петропав’ловск - Камчаткакен амъел нэнг’ынив’лэвын . Тит нымэлӄин интернет нэг’уевын 14 в’уйвык айгытӄыӈӄал, миӈки коёналаӈ 11 тысячав’ г’уемтэв’илг’у.

Эчгыпо йинчоччымав’нэн С. Тынанто.

Делитесь новостями Камчатки
в социальных сетях: