Йигыёлав’гиӈо, ӈэвэӄ яӈвойкэ кангатгиӈын, галалай вагалынык Палана

28.06.2022 16:29:09 (GMT+12)

Йигыёлав’гиӈо, ӈэвэӄ яӈвойкэ кангатгиӈын, галалай вагалынык Палана
Эмен в’уйвык Палана вагалынма ӄымэк ӈылэти самолёт, инмы нывили вагалынык. Ынниг’ан валг’ын итти панэнатвын, меӈинэв’ йигыёлав’гиӈо нэтэйкынэв’ вэтатылг’а иччетык «Аэропортав’ Камчаткакенав’».

Йигыёлав’гиӈын ӈывонэн вэтатылг’а диспетчеро, ынан йилнин гыйив’ӄэв’кин пав’ъяӄатгиӈын. То еӄӄэ ымоӈ вэтатылг’о нанэчгыпав’нав’.

Энаннимайтатылг’а эччатыӈӄо «Аэропортан Паланкэн» ымыӈ ею явэнаӈо инг’э нанчоччымав’нав’, эмен тит амъел эӈлэткэ. Вэтга ийкайтыӈ пыкейляй в’иннетычг’у.

То опта нэв’инненэв’ ӈыток пассажирав’ то йиӈэльг’этылг’у то нэллэнэв’ малав'ъяйтыӈ.

«Ынниг’ан валг’о йигыёлав’гиӈо ӄонпыӈ мыткотайкыӈвоӈнав’, тит намитытвийкынав’ инг’э энанниймататык, ӈэвэӄ еллайкэ аӄаэтг’иӈо,- эвыӈ итылг’ын инженеро тит агэгайгиӈыка нэйиӈэльг’этиквнэв’ ФКП «Аэропортав’ Камчаткакенав’» К. Павлов.

- Омакаӈ вэтатылг’а энаннимайтатылг’эн тит иткэ кангатгиӈо инг’э элэк нэччын аӄаэтгиӈын, то пассажирав’ то йиӈэльг’этылг’у наннимайтаннав’».

В’уткекьйит панэнатвылай эначгыпавылг’о ГУ МЧС Россиякен Камчатский крайиӈӄо.

Эняннимэв’нэн С. Тынанто

Делитесь новостями Камчатки
в социальных сетях: