Камчаткак наӈвон энаечегиӈын нынны вагалынэн Паланык

16.06.2022 12:16:35 (GMT+12)

Камчаткак наӈвон энаечегиӈын нынны вагалынэн Паланык
Юнэтылг’у Камчаткак нэкуг’эйӈэв’ӈынэв’ йилык нынны вагалынэн Паланык. Инэллэчг’ын администрацияк инэллэчг’ин крайик эвыӈ, эмэлкэ ӈывок йичик нынны 15 г’ылв’ыйиӈӄо алайиг’илгык каличитванык меӈин китыӈ тит яйнак 15 гэвэгиӈо краен сайтык инэллэиччетин регионык.

Галай омакальг’атгиӈын вэтатъиччетин тит йичик нынны вагалынэн Палана, в’утку нэгитэнэв’ пыӈлов’ тэг’и кумӈу нэннийнэв’ микыкъйит, меӈин юнэттумгын китыӈ ынанъэӈг’элу лыӈылг’ын, тит ынин нынны ныг’ыӈвон итык вагалынэн Паланык.

«1-12 алайиг’илгык нэннийнэв’ 227 в’аняво. Нэкминэв’ мыллыӈэн кандидатурав’, тит йичик нынны. Ныг’ыӈвонав’ йилык кумӈу сайтык инэллэиччетин крайик, меӈин китыӈ 15 гэвэгиӈэтыӈ, титэ гантоӈвав’лэн Камчатский край, гаяваӈвота в’иннетычг’ын сервис «Госуслугав’» в’отэнг’ылоӈӄо.

Ыявак валг’ык в’уйвыпиляӄык, миӈки уйӈэ атвака Интернет, эмэлкэ юнэтылг’у нанынныэняечелай тывык чининкин кандидатуран инэллэиччетык в’уйвык 21 то 22 алайиг’илгык 08:00 кытаван 20:00. В’уччин этгиӈын китыӈ тит ымоӈ гайматылг’о тэнынныӈкы ваналыны опта ныг’иннэв’ эняечегиӈык»,- эвыӈ С. Меркулов.

Янот натвынав’ 24 кандидатурав, то нанпаёчаннав’ мыллыӈэн:
1. Обухов Макар Михайлович, советский, государственный то партийный вэтатылг’ын , яноткэн инэллэчг’ын Корякский окружной Советык тыӈивылг’ин ваятэн (1930-1952).
2. Поротов Георгий Германович, ительмэнэн каличитмитычг’ын.
3. Мутовин Олег Евгеньевич, китыӈ лётчико то Героё РФ.
4. Косыгин Владимир Владимирович (Коянто)корякский каличитмитычг’ын.
5. Гиль Александр Васильевич, инанмитычг’авын мылавык, энантоӈвавылг’ын корякский мылав’ъиччет «Мэнго».

Микын нынны яявайкынэн вагалына Палана лиги нэелӈыӈын ӈывома льгэалайиг’илгын Паланык ангытыткома г’ылв’ий титэ г’уеви Камчатский край.

В’уткекьйит панэнатвылай эначгыпавылг’о инэллэчг’ин то Инэллэиччетин Камчатский крайик.

Эняннимэв’нэн С. Тынанто

Делитесь новостями Камчатки
в социальных сетях: