Лэйвылг’ын иччетнэӄу ӈывой вэтатык Тигильский то Соболевский районык Камчаткак

08.06.2022 15:22:54 (GMT+12)

Лэйвылг’ын иччетнэӄу ӈывой вэтатык Тигильский то Соболевский районык Камчаткак

6 г’ылв’ыйик алайиг’илгык лэйвылг’ын иччет ӈывой вэтатык Тигильский то Соболевский районык, митычг’а гамга вэтгиӈэпыӈ наяёг’ыӈнав’ 10 нымъёлго: Тигиль, В’эемлэн, Воямполкан, Селанкан, Усть-Хайрюзово, Хайрюзово, Ковран, Ичинский, Крутогорово, Соболево, эв’лай министерствак эналлагиӈэпыӈ инэллэиччету то энаплепав’гиӈо Корякский округык.

«В’утин лэйвылг’ыиччетык келлаӈ 20 г’уемтэв’илг’у, 17- инэнмэлэвылг’у, опта котвалаӈ вэтатылг’о Гостехнадзорык, эначгыпав’-технологический гынуныӈӄо.

Юнэтылг’э ыявак валг’ык нымнымык нэкуг’энӈынэв’ специалистав’, лыгуван инэнмэлэвыг’у. Ымыӈ ею инэнмэлэв’кинэв’ явэнаӈо нэллэйвынэв’ тит нымэлг’эв’ йичичг’этык ымоӈ юнэтылг’у. Колайвыӈволаӈ гамга в’ойвыӈӄо 25 г’ылв’ыёв’. Пылитконвэтыӈ гэвэгиӈын лэвыг’ыиччетэ етилиӈнин ымоӈ ыявакэнав’ районо», - иви Д. Прудкий.

Амалваӈ итылг’у инэнмэлэвылг’у гамга тыг’ылгиӈэпыӈ колайвыӈволаӈ: г’уемтэв’илг’ин ынпычг’ин лекар, йиччытыг’ыллыг’ычгин, гылгылекар, эльг’эн инэнчичг’этылг’ын, лылав’ъинэнмэлэвылг’ын то ӄуччев’. В’утин иччетык опта ковэтанӈыволаӈ митычг’у Гостехнадзорыӈӄо, эналлаэччатыӈӄо транспортакен то тайиг’этгиӈэн то ӄуччев’.

В’уткекьйит панэнатвылай эначгыпавылг’о инэллэчг’ин то Инэллэиччетин Камчатский крайик.

Эняннимэв’нэн С. Тынанто


Делитесь новостями Камчатки
в социальных сетях: