В. Сивак нэйичин инэллэчг’у Камчаткакен иччетык «Ыннэн валг’ын Россиян»

11.02.2021 07:33:54 (GMT+12)

В. Сивак нэйичин инэллэчг’у Камчаткакен иччетык «Ыннэн валг’ын Россиян»
9 чиӄъивив’ йиг’илгык галай умекет Камчаткакен иччетин партиякен «Ыннэн валг’ын Россиян». В’утку вачче инэллэчг’ын крайик В. Солодов.

Ӈывома умекет, видео-этгиӈэпыӈ в’аняватэ инингив’ инэллэчг’ин Государственный Думак И. Яровая. То еӄӄэ напаломтэлнав’ ӈаеё мекив’ келлаӈ партияк. Ычгынан натвынав’ вэтгиӈо 2020 гэвэгиӈыкэнав’.

Яноткэн пыӈыл итти- йичик инэллэчг’ын иччетин, мыев’ В. Раенко элэк ныг’эли эналлагиӈыӈӄо. Ынно инэллэй иччетык партиякен 2012 гэвэгиӈыӈӄо.

Мыкъята итылг’э партияк нэйичин инингив’ инэллэчг’ин Инэллэиччетык крайик В. Сивак.

Ынан ив’нин ӄайлём томгыныныйикыӈ , мыев’ нэйичин секретарё. Тывынэн миӈкые валг’о яноткенав’ вэтгиӈо ныг’итикынэв’. «Мучгин чаткаёӈгиӈын- лиги лыӈык миӈкые коёналаӈ г’уемтэв’илг’у ымыӈ ыявак валг’ык в’уйвыпиляӄык. Ӄонпыӈ йинв’анявавык юнэтылг’у, тит омакаӈ экмитык танвэтгыӈгиӈо. Ыннею ныг’итикынэв’ мучгинэв’ яноткэнав’ вэтгиӈо»,-эвыӈ В. Сивак.

В. Сивак эвыӈ, 2021 гэвэгиӈык ягалалаӈ ныквуӄинэв’ энаечегиӈо тыӈивылг’ин ваятэн Государственный Думайтыӈ то Законодательный Омакатыӈ крайик. Гамгарегионык наяӈвоӈнав’ тав’аӈкенав’ партийный энаечегиӈо имлычг’ыйиг’илгык. Мекив’ коянг’алаӈ кандидато, эмет ныг’ыӈвонав’ вэтатык омакаӈ юнэтылг’ыйик. Кандидато ныг’ыӈвойкынав’ ныг’элык, ӈаеё мекив’ чаймыӈ келлаӈ ваятыӈ, микыйик наяӈвоӈнав’ элэк йиччык эняччыгиӈо юнэттумгин гамганымъёлгык то регионык. Акметгиӈо энаечегиӈэпыӈ - энаг’ояватгиӈо, миӈкые накогэтаӈвоӈын ваята партиян»,- эвыӈ Сивак.

Омакальг’анма ӄотэнычг’энаӈ натанвэтгыӈын политсовет то инэллэиччет партиякен. То нэкминэв’ гэвэгиӈыкенав’ отчёто вэтгиӈыкъет иччетин партиякен.

Эняннимэв’нэн С. Тынанто.

Делитесь новостями Камчатки
в социальных сетях: