Берингиякен вэтатъиччет, тит яйтаӈык айгытӄываятэн этгиӈо, амъел ковэтатыӈ Камчаткак

08.02.2021 08:04:19 (GMT+12)

Берингиякен вэтатъиччет, тит яйтаӈык айгытӄываятэн этгиӈо, амъел ковэтатыӈ Камчаткак
Иччетэ энналлагиӈэпыӈ В. Броневич ёг’ынэн вано «Хальч» то «Сэмт».

Г’ытг’ин ваныӈӄо «Хальч» Н. Левковский кочоччымавыӈ «Берингияйтыӈ. В’утин гивик ынно яячвыӈчатыӈ номинацияк «Ӄонпыӈ эӈг’элу лыӈык айгытӄыкенав’ этгиӈо». Ынан еппы кутэйкыӈнин уетик.

«Тойваята в’ины инг’э накогалаӈвоӈын, чеймык ыйик колалаӈ ынпычг’у, в’отэныӈӄо ыччу кометытвэлаӈ эӈг’элу лыӈык айгытӄываятэн этгиӈо, лиги лыӈык умкылв’ыно, то ёнатгиӈо юнэтылг’ин Айгытӄыӈӄал, лыг’ук миӈкые валг’ын кунг’элыӈ ёнатгиӈын,коӈволаӈ четкеюӈык, ею тэйкык тит Камчаткак нымлӄин ёнатгиӈын ныг’итики. Ӄайлим, коячвыӈчаллаӈ г’уемтэв’илг’у гамгаваятыӈӄо. Камчаткак ӄонпыӈ омакаӈ нымэлг’эв’ мыткоёналлаӈ, то увикив’ мытков’эннянӈывоӈнав’»,- эвыӈ Н. Левковский.

Яйичг’а Александранын то Натальянын Кривогоницынычгин наконыплэпав’ӈын чининкин ваны, миӈки г’ытг’у накув’йипӈынав’ «Сэмт», меӈин китыӈ «Дальневосточный гектарык», миӈки янот итти совхоз «Камчатский». Ычгинэв’ кымиӈу опта кояччвыӈчалаӈ титэӈын «Берингияк».
«Гыммо ынанмыллыӈчаӈ тыячвыӈчатык кымичгин г’ытг’ылг’атгиӈык «Дюлин», ӈыёчаӈ ӈывогиӈык «Берингия», «Елизовский спринтак», ӈыечеӈ тыгалан «Г’ылг’ылин в’ины». Эчги тыкочоччымавыӈ итык ӈывогиӈык «Берингияк-2021», лыкл’эӈкин ангытык «Елизовский спринт», тыйитыӈ ячвыӈчатгиӈык «Г’ылг’ылин в’ины». Гымнин ынанъяноткен гайматгиӈын- омакаӈ гэньпичитэ ячвыӈчатык «Берингияк»,- эвыӈ Дарья Кривогорицына.

Номинацияк «Ӄонпыӈ эӈг’элу лыӈык Айгытӄыкенав’ этгиӈо» келлаӈ ойпакмето ӈанэныйикыӈ, микыйик ымоӈ йиг’эт нэетилиӈын уттыуетикэ, ӈыёчгайиӈ- меӈиныйик инг’э наягалаӈын ячвыӈчанма йиг’эт, ойпакмет А. С. Колеговын- ветеранынаӈ- г’ытг’ылг’ыӈ, меӈин ӄонпыӈ кенӈывоӈ номинацияк «Ӄонпыӈ эӈг’элу лыӈык Айгытӄыкенав’ этгиӈо», ойпакмет ӈанэныйикыӈ, мекив’ айгытӄываятычг’энаӈ гакеметг’айпылэнав’ ячвыӈчанма. Пылв’ынтогиӈо в’утин ойпакметын наятвыӈын оргкомитета. В’уткекъйит панэнатвылай эначгыпав’ъэччатыӈӄо губернаторэн то Инэллэиччетин крайик.

Эчгыпо йинчоччымав’нэн С. Тынанто.

Делитесь новостями Камчатки
в социальных сетях: