Вэтатъиччетэ «Берингия» наёг’ын ваны, миӈки накув’йипӈынав’ г’ытг’у «Кайӈыран» то «Г’ылг’ылин г’ытг’у»

03.02.2021 09:08:00 (GMT+12)

Вэтатъиччетэ «Берингия» наёг’ын ваны, миӈки накув’йипӈынав’ г’ытг’у «Кайӈыран» то «Г’ылг’ылин г’ытг’у»
Вэтатъиччетэ пыӈлойпыӈ яйтаӈык то йингычголавык айгытӄываятэн этгиӈо амъел котэлэӈвоӈнэн вано, миӈки накув’йипӈынав’ г’ытг’у. Ӈанко омакаӈ г’ытг’ылг’ык накотанвэтгыӈнав’ пыӈлов’, миӈкые амъел йиплэпавык айгытӄываятэн г’ытг’ылг’атгиӈо.

Йитг’атвылӈыма накотвыӈвоӈнав’ в’аняво,миӈкые валг’ын этгиӈын китыӈ ойпакметын «Ӄонпыӈ лиги лыӈык этгиӈо Айӄытӄыкэнав’» тит яйтаӈык то йингычголавык айгытӄываятэн г’ытг’ылг’атгиӈын «Берингияк». Танвэтгыӈма вэтатъиччетэ, ымыӈ в’аняво накокалэӈвоӈнав’ тит йилык оргкомитетыӈ.

28-29 лыгуллэв’ыт йиг’илгык инэллэчг’э вэтатъиччетык В. Броневич то итылг’ын Иччетык айгытӄываятэн Н. Лазутина наёг’ын ваны, миӈки г’ытг’у накув’йипӈынав’ «Кайӈыран» то «Г’ылг’ылин г’ытг’у»

«Ойпакметгиӈык «Ӄонпыӈ лиги лыӈык этгиӈо Айгытӄыкэнав’» эмэлкэ ныг’итикынэв’ ымоӈ гайматылг’о, меӈиныйик наягалаӈын в’ины «Берингиякен» уттыуетике. Утгыкэ итык в’утин ячвыӈчатгиӈык, тит галак йиг’эт айгытӄываяткэчг’энаӈ эвыӈ»,-инэллэчг’ын вэтатъиччетин В. Броневич.

Йитг’атвылӈыма ванык «Кайӈыран», омакаӈ этынвылг’ык А. Бразалук натанвэтгыӈнав’ пыӈлов’ тит амъел йиплэпавык айгытӄываятэн г’ытг’ылг’атгиӈо. В’анявалай кывайикъйит г’ытг’ыӈ, то миӈкые валг’о ныг’итикынэв’ уетику, меӈию нанг’ыявайкынав’ ячвыӈчатгиӈык.

«Гыммо тыячоччымавыӈ ячвыӈчатык айгытӄываятычг’энаӈ кулингивик. Ячвыӈчатгиӈын тыентыльг’энӈын гымык аньпечейикыӈ Илларионовынаӈ О. П. то Бразалук И.И., меӈийит йитг’этвылӈыгыг’и Ӄараӈыник Карагинский районык»,- иви А. Бразалук.

Янотычг’ын «Берингиякен» гыйипылг’ын «Г’ылг’ылин г’ытг’у» А. Семашкин панэнатвэ, миӈкые валг’о уетикив’ етэйкикынин.

«Гымнан чинин тыетэкыӈын уттыуетик, тит ынно нымийкуӄин то ныплэпӄэн ныг’итики»,- эвыӈ А. Семашкин.

Ойпакметык «Ӄонпын лиги лыӈык этгиӈо Айгытӄыкенав’» келлаӈ ӄуччев’ ячвыӈчатгиӈо-меки елэйки уттыуетикэ, мекив’ мэлинг’э яг’ытг’ылг’ыллайкэ, ойпакмет А. С. Колеговын- ветеранынаӈ г’ытг’ылг’атгиӈэпыӈ, то айгытӄычг’энаӈ кимитг’алг’ын. Тэг’и пылв’ынто келлаӈ наятвыӈын оргкомитета.

«Ӄылгэлогиӈо китыӈ, мыев’ уйӈэ элэг’укэ мытынтынат Р. Холмурадов то В. Демченко, мыев’ ычгынан натав’аӈнав’ г’ытг’ылг’атгиӈо. Ойпакметгиӈын «Ӄонпын лиги лыӈык Айгытӄыкенав’ этгиӈо» гэнв’эӈэлин ымыӈ мекыйикыӈ то китыӈ г’ояӈ валг’о»,-эвыӈ В. Броневич.

В’уччин номинациян гантоӈвав’лэн 2016 гэвэгиӈык тит яйтаӈык то йингычголавык айгытӄываятэн этгиӈо то ёнатгиӈо, то яйтаӈык айгытӄываятэн г’ытг’ылг’атгиӈын.

Эняннимэв’нэн С. Тынанто.

Делитесь новостями Камчатки
в социальных сетях: