09.12.2020 18:24:00 (GMT+12)
Эӈг’элу лыӈылг’ытую юнэттумгу!
Законодательный Умекетэ крайик, то иччетэ «Ыннэн валг’ын Россиян» мыткопоздравляллаӈтык 90 гэвэгиӈыкъет Корякский округ!
Ыннин ангыт китыӈ ымоӈ Камчаткакен. Ӄоньг’айичыӈкэн мынгыто гэвэгиӈо- тыттэль нымейиӈӄин вагиӈын. Ымвагиӈык имы миӈкые валг’ын итти историян, то ӈынвыӄ ею ӄотэнычг’энаӈ ныг’аллай. Ятан уйӈэ алавӈ энг’элкэ г’уемтэв’илг’у, меӈиныйик тыттэль лыӈу нэкулӈыӈын чининкин нутэнут. Корякиян- уйӈэ ятан иткэ ёнатвано. Ыннин китыӈ яяӈа гамгаваятэн, меӈинычгин ымыӈ ею чининкинэв’ котвалан ‘.
Тыӈивылг’у ваятэн Корякский округыӈӄо ӄонпыӈ котгыманӈыволаӈ эняечелг’ыӈ, ӄонпыӈ накотвыӈвоӈнав’ аӄайпыгиӈо округкен эналлачг’ыйикыӈ крайик. Тыӈивылг’э ваятэн опта натвынав’ в’аняво акменма краевой бюджет, тит пылв’ынто ныг’итикынэв’ Корякияӈ 2021-2023 гэвэйтыӈ.
2021 гэвэгиӈык накончоччымав’ӈынав’ йинтыватык ӈыёӄ малав’ъяпелляӄо (ФАПо) в’уйвык Корякский округык. Коӄайтплэпав’лаӈ ячлг’атгиӈо юнэтылг’ин округык. В’эемлэк ялгылай тойяяйтыӈ 24 яйичг’о, эчги этг’у нэкутэйкыӈнэт яят. 10 нытуйӄинэв’ яяв’ гояв’лай Тэличчак, Тымлатык, Кольпачык, Седанкак,Эчг’эйик, В’ыв’нык, Ӄайильг’инык, Аяӈкэк, Ковранык.
Тыкомычв’ынатыӈ, омакаӈ мыччангычголав’ӈынав’ ёнатгиӈо Корякияк, мыччаныплэпав’ӈынав’ социально-экономикакенав’ этгиӈо, тит ымоӈ нымэлг’эв’ нэюнэтикынэв’. То тит амъел нанг’ыяйтаӈэкынав’ пыттоӈо чинин ваятэн то нучельӄин.
Тыкивыӈ, амъел нымитг’атвийки Корякиян, то юнэлг’у этг’ылкэ ныг’итикынэв’, ымыӈ ею нымэлӄинэв’!
Инэллэчг’ын Законодательный Умекэтык крайик, то итылг’ын иччетык «Ыннэн валг’ын Россиян» Валерий Раенко.
Энаннимэвылг’ын С. Тынанто.
