Поздравлениян Владимирын Солодовын

09.12.2020 18:17:47 (GMT+12)

Поздравлениян Владимирын Солодовын

Эӈг’элу лыӈылг’ытую юнэтылг’ытую Корякский округык!

Ынаннымэлӄинэв’ тойкыӈ поздравленияв’ 90 гэвэгиӈыкъет титэ гантоӈвав’лэн Корякский округ!

Корякиян - ынан янъя валг’ын нучельӄын, меӈин наяӈвоӈын йиплэпавык, в’утку келлаӈ ымыӈ нучельӄыкинэв’ пыттоӈо то культуракенав’ метг’агиӈо. Яноткэн пыттоӈгиӈын китыӈ - ваят, меӈининэк тыттэль эӈг’элу кулӈыӈнин , ӄэй ныӄэялгыӄэн чининкин нутэнут то наконгыеванӈывоӈын гыматгиӈын лывык эччыгиӈо гамгаг’ылв’ийкената вэтгиӈа.

Корякский округык келлаӈ ӈынвыӄ аӄайпыгиӈо, меӈию мыкаллай ӈынвыӄ гэвэгиӈо. Эчгикинэв’ ёнатгиӈо ниччыӄинэв’, ымыӈ нымъёлгык ӈынвыӄ ею коӄланӈыволаӈ, опта печгыӈ коӄланӈыволаӈ, ӈэвэӄ тэг’ипиляӄу котвалаӈ, ынняӄ вэлатгиӈо ныг’умвилӄинэв’. Тит ыннею аӄайпыгиӈо элэк йиччык, мытыӈвонав’ йинчоччымавык тайкыёв’, ымыӈ ею явак, тит йиплэпавык ёнатгиӈо округык, то тит нымэлӄинэв’ вагиӈо ныг’итикынэв’ гамгаяйичг’эн. То опта малъёнатгиӈо ныг’итикынэв’ гамгаг’уемтэв’илг’ин. В’отэныӈӄо гамгагосударстаенный тайкыёк Камчатский крайик нэкутэйкыӈнэв’ танвэтгыӈгиӈо йингычголавык ёнатгиӈо Корякский округык.

Ёнатгиӈо ыявак итылг’ык районык ниччыг’эв’ валг’о. В’ача ёг’ык ыччу ятан йиӈльг’этэ. То айгыӄыӈӄал ӄонпыӈ ынкыяпыӈӄо коёналаӈ ныкетгуӄинэв’, нывэтӄэнав’ то эйимгымгыкылг’энав’ г’уемтэв’илг’у, накогалаӈвоӈнав’ эччыгиӈо, то уйӈэ титэ апелака чининкин этонотан. Чав’чываокруг- уйӈэ итке ятан ёнатвано, ыннин китыӈ ыннэн яяӈа, миӈки коёналаӈ амалваӈ валг’о ваято. Ычгинэв’ котвалаӈ чининкинэв’ пыттоӈо, культуракенав’ этгиӈо. Гыммо тыттэль тыкомычв’ынатыӈ, ӄулинкинэв’ этгиӈо округкэнав’ еллайкэ ынниг’ан валг’о,миӈкые мочгынан мыччатайкылаӈын. Увикив’ мынг’ыеёлэкынав’, мынг’ыв’иннетикынэв’, ныг’итики нымэйиӈӄин гайматгиӈын тэйкык нытуйӄин, ныплэпӄэн Корякиян. Ымоӈ эчги ныг’ыӈвойкынав’ четкеюӈкы, миӈкые валг’ын вагиӈын йитыӈ чининнутэк, то ымоӈ нэюнэтикынэв’ то навэтатэкынав’ тит нымэлӄинэв’ этгиӈо нэг’уев’нэв’ этонотак. Чемот ятан ав’аняватка, мыныӈвола вэтатык. Эв’ынчам омакаӈ мыччаннимайталаӈын иччиёнатгиӈын!

Этог’ылв’ыйикъет, Корякский округ!


Тыкопоздравлянӈынав’ ангытыкъет гамгаяйичг’ын, гамгаюнэтылг’ын! Ӄайлём, мыев’ гамгаг’ылв’ийкин вэтгиӈа кончаймав’лаӈыткы ваг’иӈын титэ Корякияк ягаймалайкэ юнэтык то вэтатык!

Владимир Солодов, инэллэчг’ын Камчатский крайик.

Энаннимэвылг’ын С. Тынанто.

Делитесь новостями Камчатки
в социальных сетях: