Камчаткак галай энаг’ояватгиӈын каликалин «Вэтгиӈо юнэтылг’ин Корякский округык энма Майӈытанӈычетгиӈын»

05.12.2020 10:27:20 (GMT+12)

Камчаткак галай энаг’ояватгиӈын каликалин «Вэтгиӈо юнэтылг’ин Корякский округык энма Майӈытанӈычетгиӈын»

Камчаткак галай энаг’ояватгиӈын каликалин «Вэтгиӈо юнэтылг’ин Корякский округык энма Майӈытанӈычетгиӈын».

3 яяв’очг’ыйиг’илгык ванык, миӈки наков’ъепӈывоӈнав’ каликалу нынылг’этылг’ын С. А. Крашенинниковын галай энанг’ояватгиӈын каликалин «Вэтгиӈо юнэтылг’ин Корякский округык Майӈытанӈычейма». В’уччин каликал накалин яйнама 75 гэвэгиӈо Эналватгиӈэн то 90 гэвэгиӈо титэ гантоӈвав’лэн Корякский округ.

В’утку гэнумекэв’линэв’ архивный яйтаӈо, миӈки гакалилинав’ юнэтылг’у Корякский округык, йинойпакмэвылг’о медаля «Малвэтгиӈыкъет Майӈытанӈычейма 1941-1945 гг»,то котвалаӈ исторический калечетгиӈо то инепйиньӈу.

Инэллэчг’э крайик В. Солодовынак эвыӈ каликалык

: «Каликал «Вэтгиӈо юнэтылг’ин Корякский округык Майӈытанӈычейма» китыӈ энангыеватгиӈо, ачгэкэнайтыӈ камчаткалг’а лиги нэкулӈыӈнэв’ то антыгэватка мучгинэв’ юнэттумгу- ветерано, вэтатылг’о Майӈытанӈычейма. Мейӈэтылг’э антыгэватка пыллыӈгиӈын ӄайтумгин, юнэттумгин, мыччапелаӈнав’ ӄулин ёнатылг’ыйикын тыттэль нымэлӄин энакетог’атгиӈын ёнатылг’ыйикын Корякский округык то Камчатский крайик».

Йитг’атвылӈыма, йингыеванма нытуйӄин каликал калечетылг’ыйикыӈ в’аняватгыг’э вице-губернатор П. Ясевич то инингив’ инэллэчг’ын Инэллэиччетык крайик В. Сивак. Ыччи ив’в’ыг’и, в’уччин каликал йитики антыгэватка то ӄонпыӈ лиги лыӈык ымыӈ ею янг’ав’ Майӈытанӈычетыкъет.

Каликал ганчоччымав’лэн то нантоӈвавын Т. М. Хелол, этолг’ын Паланык вэтатылг’ын Агенствак ЗАГС то архивный этгиӈэпыӈ Камчатский крайик. Опта каличитылг’у итти В.Т. Броневич этонутэн ынин китыӈ Сопочное Тигильский районык, 2011-2016гг вэтатэ инингиву инэллэчг’ын Инэллэиччетык крайик, 1996-2000 гг итти инэллэчг’у Корякский округык, эчги ковэтатыӈ вийиӈычг’у г’уемтэв’илг’ин Камчатский крайик.

В. Броневич эвыӈ, еппы эплиткукэ ыннин вэтгиӈын, мыев’ архивык котвалаӈ ӈывыӄ имыяӄ пенинэв’ энакетог’атгиӈо. Амъел наякалиӈнав’ нытуйӄинэв’ историякэнав’ этгиӈо.

«4 гэвэгиӈо мытъяванав’ яйнама 75 гэвэгиӈын титэ итти Эналватгиӈын. Мытъйичинэв’ юмекэвык калив’ филиалык КГКУ «Государственный архив Камчатского края», районный муниципальный архивык округэн, мытынв’аняванав’ юнэтылг’у округык. Мытытгымат вэтатык, ӄэй ниччыӄин вэтгиӈын, мыев’ ымыӈ ею янг’ав’ валг’о тывыгиӈо ныг’итикынэв’. Ӈынвыӄ в’эннялай вэтатылг’о аривык то чинин юнэтылг’у. То вэтанма каликалык, опта эллай инэгэю, тывылг’о юнэтылг’э. Ӈынвычгая юнэтылг’э нэлэг’унэв’ каликалик ычгинэв’ ӄайтумгу, юнэттумгычгин, меӈию янот уйӈэ лиги элӈыкэ»,- панэнанвыгыг’э Т. Хелол то В. Броневич.

Ыннин китыӈ ӈыеӄэв’кин каликал, меӈин нантоӈвавын Т. Хелол то В. Броневич. 2018 гэвэгиӈык ычгынан нэтэйкын энанйеёлав’каликал «Корякиян.Гэвэгиӈо. Этгиӈо. Янг’ав’ валг’о калив’», в’утку накалинав’ ымыӈ ею Корякский округыкъет. Ымыӈ каликалыт нантоӈвав’нат иччетэ «Камчатпресс».

Эчгыпо энаннимэв’нэн С. Тынанто.

Делитесь новостями Камчатки
в социальных сетях: