Ангытыткогиӈын 90 гэвэгиӈыкъет титэ гантоӈвав'лэн Корякский округ нэетэйкыӈын митг'айин пэкляткогиӈын

13.11.2020 16:09:35 (GMT+12)

Ангытыткогиӈын 90 гэвэгиӈыкъет титэ гантоӈвав'лэн Корякский округ нэетэйкыӈын митг'айин пэкляткогиӈын
Инэллэиччетык Камчатский крайик галай омакальг'атгиӈын миӈки натанвэтгыӈнав' чоччымав'гиӈо яйнак 90 гэвэгиӈо Корякский округэн. В'утку эллай ымыӈ инэллэчг'у муниципальный иччетылв'ыныӈӄо. Ычгынан натвынав' миӈкые валг'о тэнмо ганчочымав'лэнав' гамга в'уйвык тит нымэлг'эв' яйнак 90 гэвэгиӈо окрукен.

Инэллэчг'у районкэнав' панэнатвылай, миӈкые валг'о этгиӈо эмет галалай в'утин гивик тит яйнак 90 гэвэгиӈо округэн, опта натвынав' тэнмо, миӈкые ягалаӈ ангыт 10 яяв'очг'ыйиг'илгык.

Инингив' инэллэчг'ин Олюторский районык С. Губарева эвыӈ, районык нэтэйкын энанг'ояватгиӈын каликалин, имы яӄ оечватгиӈо, ячвыӈчатгиӈо рисункакенав', энанг'ояватгиӈо йипыткавэн историяӈӄо районэн. С. Губаревынак янъя тывынэн "Нымэйиӈӄин этнографический калечетгиӈын". Ыннин диктант накалин 80% калэйтылг'а, то опта эллай юнэтылг'у районык.

Опта накончоччымав'ӈын нымэйиӈӄин онлайн- энанг'ояватгиӈын ынан митычг'ин тэйкык ымыӈ ею.

Ымычвилю йиг'илгык галалай ячвыӈчатгиӈо ӄаплиткогиӈэпыӈ яйнама 90 гэвэгиӈо Корякский округэн.

В'эннятгиӈэпыӈ вэтатылг'эн архивык, янг'ав' нэгитэнэв' документав' ынпыюнэтылг'ин районык, мекию келлаӈ этотомго районкэн то Корякский округэн. Ийкыӈ накончоччымав'ӈынав' ӄавэёчго. Ыннею ӄавэёчго нэейилӈынэв' ийкыӈ яяк.

"Плиткойтыӈ кытэплёйиг'илгын нэетэйкыӈнэв' никмыӄинэв' фильмав' нымъёлгыкъет меӈию келлаӈ районык. Нэтэнынныӈын "Эӈэлу лыӈма чининкин в'уйвын" Ыччу наӈвонав' тэйкык алак. Аӄачыг'ычгиӈыкъет ыччу наянтыванӈынав' социальный калечетгиӈык, Тэличчак гынунык ӈайӈынок экранык опта нэенгыйивэӈынэв' нэӈиньмыӄинэв' мылаво, аӈаӈъяв'  чининкин энанв'алэлӈавычг'эн, то ӄуччев' ымыӈ ею, тит нэкычвильг'этикынэв' юнэтылг'у ангытыткома",- эвыӈ С. Губарева.

Чинин пылв'ынта Олюторский районкэн нэтэйкынэв' имы миӈкые валг'о ангыткэнав' гыйив'ӄэву- календарё, имы яӄ митг'айинав' манигытг'улин флаго то вымпело. Пылиткома ангыт этог'ылв'ыйикъет Корякский округ Тэличчак йитыӈ митг'айин пэляткогиӈын, салюто лыӈылг'ын.

Инэллэчг’ын Тигильский районыӈӄо А. Пригоряну эвыӈ, 1 -11 ячв’очг’ыйиг’илгык гамга иччетык культуракэн то яйгочав’ӈыгиӈык нэтэйкыӈнэв’ этгиӈо «Гымкыӈ уйӈэ атвака Россиян, ӈэвэӄ итке ыппулюӄин Корякия». Библиотекак ягалалаӈ уроко, миӈки наяпанэнатвыӈнав’ историякенав’ то чининнутэкинэв’ этгиӈо. Тит лиги нэнг’ылӈикынэв’ государственный инэллэчг’у, калимитычг’у Корякский округкенав’. 10-11 яяв’очг’ыйиг’илгык ягалалаӈ айгытӄываяткэчг’энаӈ ячвыӈчатгиӈо «Уйичвэту айгытӄываятэн», то еллаӈ ангытыткогиӈо гамгав’уйвык районык, миӈки наятвыӈнав’ г’уемтэв’илг’у эӈг’элу лыӈылг’у вэтатыкъет йиплэпавык ёнатгиӈо чининнутэк. Опта накончоччымав’ӈынав’ ымыӈ ею нэӈиньмыӄинэв’ кымеӈыйикыӈ.

Чоччымав’гиӈыкъет йитг’этык  этог’ылв’ий округэн панэнатвэ А. Колесниченко. Ынно эвыӈ, ангытыткома гамга в’уйвык Пенжинский районык еллаӈ радио-концертав’, нэенгыйивэнӈынэв’ фильмав’ этог’ылв’ыйикъет округэн. То метг’аӈ ымыӈ явытгыё нэетэйкыӈэв’ тит нэйиг’этикынэв’ юнэтылг’у ангытыӈ.

Округэн гынунык Паланык, нэенгыевэнӈын татыл «Ололо», опта еллаӈ спортакенав’ ячвыӈчатгиӈо, нэетэкыӈын ангытыткома митг’айин никтыльгыяӄэн пэклаткогиӈын.

Инингив’ инэллэчг’ин Карагинский районык Т. Рубанова эвыӈ, ымоӈ в’уйву наянмитг’атванӈынав’ ангытыткойтыӈ. Калэяк когалалаӈ ячвыӈчатгиӈо лыг’ук ынан митг’айинав’ рисунков’, кымиӈыйик нэкутэйкыӈнэв’ открыткав’. 10 яяв’очг’ыйиг’илгык майӈыэкранык нэенг’уевэнӈынэв’ фильмав’ округыкъет, то ымыӈ ангыткенав’ концертав’.

Итылг’ын вице- губернаторо крайик П. Ясевич в’аняванма эналлачг’ыӈ гамга в’уйвык эвыӈ, тит лиги нэнг’ылӈикынэв’ аӄачыг’ычгиӈыеэнав’ этгиӈо. В’отэныӈӄо нытгипг’ав’ ымыӈ ею тэйкык ангытыткома. Лиги лыӈык еппы китыӈ COVID-19. То эв’ынчам ымыӈ ею метг’аӈ йинчоччымавык, тит нымэлг’эв’ нагалан ангытыткогиӈын этог’ылв’ыен Корякский округэн манэнынаӈ конг’алаӈ 90 гэвэгиӈо.

Эчгыпо йинчоччымав’нэн С. Тынанто.

Делитесь новостями Камчатки
в социальных сетях: