Новости Камчатки на корякском языке за 19.09.2020 г.

19.09.2020 10:12:46 (GMT+12)

Новости Камчатки на корякском языке за 19.09.2020 г.
В'уйвык Озерновский то Запорожье нэтэйкын яӈъя валг'ын этгиӈын ЧС, тит амъел атг'ылпенника аӄачыг'ычгиӈа юнэтылг'у ӄутин нымъёлгык.

Ыннин этгиӈын нэтэйкын, тит иччету Росгвардия то полиция нэв'иннетикынэв' юлвык галӈыл атав'амтым лэйвылг'у г'уемтэв'илг'у. Мыев' в'утин в'уйвык амъел комкалаӈ тыг'ыллыг'у нытуйӄин валг'а аӄачыг'ычгиӈа",- эвыӈ инингив' инэллэчг'ин Инэллэиччетык крайик Р. Василевский.

В'утку нэплиткун майӈыынныӈийтыгиӈын. То ӈанӄойиӈ, ӈынвычгаё етылг'у вэтатынвэтыӈ, ӈыволай эӄэвык. Ӈэвэӄ актыгитэкэ ыннею лайвыгиӈо, ынняӄ гымлэ яӈвоӈ итык тыг'ылгиӈын COVID - 19 ӄутин в'уйвык.

"Эмэлкэ йиг'аӄав'лайкэ ӈаеё, меӈиныйик нэенг'уевэнӈынэв' калив', миӈки гакалилин - уйӈэ ыччу этг'ылкэ аӄачыг'ычгиӈа то нэтэйкынэв' тесто тыг'ылгиӈэпыӈ COVID - 19. Опта эмэлкэ ялайвылайкэ инэйив'лэтылг'у вэлиткояйтыӈ. Ынняӄ , эӄэвылг'у нэеччиликынэв', титэ ычгынан нэетэйкыӈнэв' 100 процентакенав' йичечг'атгиӈо тыг'ылгиӈэпыӈ , лыӈылг'у тестированияв'э",- иви Р. Василевский.

Инэллэчг'э Камчаткакен В. Солодовынак омакальг'анма, миӈки накогетаӈвоӈнав' пыӈлов' тит амъел амкатка аӄачыг'ычгиӈын, йилнин тайкыёв' майӈычг'ыйикыӈ районык йинчоччымавык ыннэн этгиӈын тит йинкетгутвивык валомгиӈын.

"Соболевский, Усть-Камчатский, Карагинский, Олюторский то Усть- Большерецкий. В'утку ныг'итики ояӈ валг'ын тэнмын, миӈкые вэтатык. Гыммо тыкивыӈ, точгынан ӄынвэтгыльг'ав'лагыткы инэллэг'у в'уйвыкинэв', тит экмитык тайкыёв' миӈкые амъел итык, тит тыг'ылгиӈын амъел амкатка. В'утку нытгипг'ав' ымыӈ ею гитэк, тит еӄӄым анг'отав'ка юнэтылг'у имы яӄ административный этгиӈэпыӈ. Ынняӄ Озернойикъет, гыммо опта ынаныӈ туйик тыкучеткэюӈыӈ. Мыев' мыткулыг'уӈнэв', тэӄын онтымав'лай" ,- эвыӈ В. Солодов.

*

Нымэлӄин кытгемгиӈын китыӈ эняччыгиӈо аӄачыг'ычгиӈыӈ COVID-19 - гаяйтаӈӈывота увикив'.

Ӄонпыӈ ганмытӈывота мынго, мылата конмыӈнэн ымоӈ микробав'.

Гаяваӈвота г'иӈытг'ым айпиньӈу то ыннеӈчеӈ эпылг'о йилгылилив', тит увикив' яйтаӈык то ӄуччев' атг'ылпэнника.

Ӄонпыӈ ганмытӈывота мынго антисептиката кымг'ылэма вэлиткояӈӄо, лайвыгиӈыӈӄо.

Кытыл чеймык итке ӄутин г'уемтэв'илг'ык 1,5 - 2 метрав', титэ миӈки котваӈволатыӄ  ӈэвэӄ ӈынвыӄ г'уемтэв'илг'у котвалаӈ.

Эчгыпо йинчоччымав'нэн С. Тынанто.Новости Камчатки на корякском языке за 18.09.2020 г.: https://poluostrov-kamchatka.ru/pknews/news/detail.php?ID=279465

Делитесь новостями Камчатки
в социальных сетях: