Новости Камчатки на корякском языке за 27.08.2020 г.

Пыче итылг'э инэллэчг'у йилнин яӈъя валг'ын тайкыён, тит амъел аӈвока тыг'ылгиӈын аӄачыг'ычгиӈа.

"Инмы пыче коплэпавыӈ этгиӈын, ынняӄ мальайгывэ нэлэг'унэв' аӄачыг'ычгиӈылг'о майӈыынныӈийтыг'ытвынэӄук: тыг'ылӈыволай 63 г'уемтэв'илг'у. В'отэныӈӄо еппы ныкыттыг'ав' ӄонпыӈ лиги лыӈык, миӈкые яйтаӈык увикив' тит атг'ылӈывока. В'уткекьйит ӄонпыӈ тэйкык йичечг'атгиӈо вагалынык, то гитэк ӈаеё мекив' в'отӄойиӈ коеӈаӈволаӈ. То яӈъя йичичг'этык ӈаеё мекив' кокымг'ылэӈволаӈ паӈав'ъейиӈӄо",- эвыӈ пыче итылг'ын инэллэчг'у крайик.

Ынан йилнин тайкыёлӄыл, миӈкые етылг'э паӈав'ъейиӈӄо  нэнг'ытэйкикынэв' тесто, то миӈкые ыччу ныг'итикынэв' чининнучельӄык тит увикив' яйтаӈык тыг'ылгиӈыӈӄо.

*

В. Солодовынак такалиӈнин тайкыён, тит амъел йиннимайтавык энанг'отав'гиӈо аӄачыг'ычгиӈыкъет 31 ӄайчейпыйиг'илгэтыӈ.

Кытаваӈ нанг'ыявайкынав' г'иӈытг'ымайпиньӈу гамгалэйвинэӈык, вэлиткояк, социальный ванык, инэллэиччетылв'ынык. Ыннею энанг'отав'гиӈо гантоӈвав'лэнав' крайик гыёлг'атйиг'илгык аӄачыг'ычгиӈыкъет. Ӈэвэӄ ӄыйим ыннею энанг'отав'гиӈо этилике, еллайкэ административный штрафо.

*

Нымэлӄин кытгемгиӈын китыӈ эняччыгиӈо аӄачыг'ычгиӈыӈ COVID-19 - гаяйтаӈӈывота увикив'.

Ӄонпыӈ ганмытӈывота мынго, мылата конмыӈнэн ымоӈ микробав'.

Гаяваӈвота г'иӈытг'ым айпиньӈу то ыннеӈчеӈ эпылг'о йилгылилив', тит увикив' яйтаӈык то ӄуччев' атг'ылпэнника.

Ӄонпыӈ ганмытӈывота мынго антисептиката кымг'ылэма вэлиткояӈӄо, лайвыгиӈыӈӄо.

Кытыл чеймык итке ӄутин г'уемтэв'илг'ык 1,5 - 2 метрав', титэ миӈки котваӈволатыӄ  ӈэвэӄ ӈынвыӄ г'уемтэв'илг'у котвалаӈ.

Эчгыпо йинчоччымав'нэн С. Тынанто.Эчгыпо Камчаткакенав' чав'чываеличг'энаӈ 26.08.2020 г.: https://poluostrov-kamchatka.ru/pknews/news/detail.php?ID=278653