Гымлэ ӈыволай еӈальг’атгиӈо гынуныӈӄо Камчаткакен Оссорайтыӈ

25.12.2020 12:15:14 (GMT+12)

Гымлэ ӈыволай еӈальг’атгиӈо гынуныӈӄо Камчаткакен Оссорайтыӈ

Яноткен самолёт вагалэ аэропортак Оссорак. Мыллыӈэн гэвгиӈо юнэтылг’у Оссорак еӈальг’алай нывилэ ӄутин вагалынык. Еӈальг’атгиӈо наӈвонав’ мыев’ нэплиткунэв’ энаныплэпав’вэтгиӈо ваналынык.

«Вагаланы Оссоракен- юлэӄ йиныплэпавылг’ын, ымоӈ майӈынутэк лиги нэкулӈыӈын. Выг’аёк нэплиткун. Мыллыӈэн гэвэгиӈо уйӈэ Оссорайтыӈ эйиӈэльг’эткэ эллай самолёто. Янот кояйтыӈволаӈ гайӄытайля Тэлличчан. Йиӈэльг’этык накояваӈвоӈнав’ 5 чачив’. Эчги гымлэ яӄам коег’аӈволаӈ Оссорайтыӈ. Ыппульг’ав’ мыкыӈ ӈыччеӄ чаччит накояваӈнав’, тит вагалык Оссорак», - эвыӈ В. Солодов.

2015 гэвэгиӈык натактыӈын вагалыны Оссоракен, мыев’ еӄӄым петатэ. Янот ковэтанӈыволаӈ вагаланык етылг’у иччету. Ычгынан эплиткукэ вэтгиӈо нэнтынэв’, мыев’ уйӈэ лиги элӈыкэ эччыгиӈо айгытӄыкенав’. 2018 гэвэгиӈык ӈывой вагалынык вэтатык чининкин иччет «Устой-М». Эчги иччетэ нэплиткунэв’ яноткэнав’ вэтгиӈо, то 2021 гэвэгиӈык эмэлкэ ымыльг’ыӈ яӈвоӈ вэтатык, эв’лай Росавиацияк.

«Нэтэйкынэв’ нымэйиӈӄинэв’ вэтгиӈо, нэначчын вагалыны 4810 плитата . Эв’лыгиӈын вагалынэн китыӈ 3600 м то пав’гиӈын 36. Ымыӈ вагалыны китыӈ 58 тысячав’ кв м»,- эвыӈ М. Логинов, инигив’ инэллэчг’ин транспортакен то тайиг’этгиӈэпыӈ крайик.

Итылг’ын пилото, эвыӈ, метг’аӈ нэтэйкын вагалыны, мыев’ ныйикыг’эв’ вагалай.

«Гыммо янот тыговагалӈывоӈ пенин вагалынык, унмык мытког’аӄайпыӈволаӈ, мыев’ унмык гачималин вагалыны. Эчги нытуйӄин то ныплэпӄэн. Майӈыӈ валг’ын Пананкэн вагалынык. Юнэтылг’у тыттэль коег’алаӈ»,- эвыӈ Е. Лысенков, мэйӈычг’ын самолётык АН-26.

Еӄӄэчг’ам ӄонпыӈ яӈволайкэ йиӈэльг’этык гамга понедельникак то четвергык. В’аняванма, инэллэчг’ын КАП Е.Храбров эвыӈ, ӈэвэӄ яв’аӈлалаӈ юнэтылг’у, то наянымкав’ӈынав’ еӈальг’атгиӈо.

Ӄутин гивик амъел наяныплэпавэкынав’ вэтгиӈо вагалынык, меӈин китыӈ Оссорак. Нэеплиткуннэв’ ымыӈ йиг’это вагаланкэнав’, ымыӈ аякальг’атгиӈо наянтыванӈынав’ тит нымэлг’эв’ навэтатэкэ аэропорт. То тит ӄэй тэг’и самолёто ныг’ытвагалэкынав’.

Йиньнимэв’нэн С. Тынанто.

Делитесь новостями Камчатки
в социальных сетях:

Свежие новости Камчатки, новости Петропавловска-Камчатского