Метг’агиӈо Пенжинакенав’

09.12.2020 11:41:50 (GMT+12)

Метг’агиӈо Пенжинакенав’

Гымнан унмык эӈг’элу тыкулӈыӈын Каматкан. Ыннин гымнин Этонотан.

Ӈынвыӄ тыкукаличитыӈ Камчаткакъет, тыкокалэйилӈыӈвоӈ историякьет, гымык столгэӈкы коёпытваӈ картан Корякиякен.

Ӄалалв’ынык комтывэӈ, гэтама карта, тыкулыг’уӈын, миӈкые ыппулюайгытӄыв’уйвыпиляӄу, тэӄын в’эем Пенжина, комакалаӈ Камчаткак, то еӄӄэ коӈвоӈ итык ныквуӄин Дальний Восток.

Яноткенав’ кетог’ыгиӈо-миӈкые аму мыткуйиӈэн «Аннушката». Ыллыг’а кинэнгыйивэтыӈ:

- Ӄыгит, Ирочка, ив’тылык в’эем! Ыннин в’эем Пежина!

Ив’тыл ӄыеӄий в’эемин, гэнайлялэн аму яӄ гейнэкыӈ, то камлэлыӈ г’ылг’ылъэмнуӈ.

Верталёто то самолёто ыпполёӈӄо лиги тыкулӈыӈнэв’, мыев’ найтогым то тымэйӈэтык Корякский автономный округык айгытӄыӈӄал Камчаткак, Пенжинский районык, в’уйвык Апигин, меӈин китыӈ чеймык вангиӈык в’эемин Пежина. Ыннин чывипыт Камчаткакен, меӈин кучымлиӈ майӈынотайтыӈ Россиянэн.

Айгытӄыӈӄал гамгав’ойвэпыӈ колайвыӈволаӈ йиӈэльг’этэ. Инмы опта котвалаӈ г’ытву, ведеходо то ӄуччев’, ам самолёто нинг’ыӄинэв’.

Ятан самолётыӈӄо ялаг’олаӈынты митг’айин нучельӄын Пенжинский эмнуӈин, Корякиякен, гымнин этонутэн, ынин ныквуӄин в’эем Пенжина, ымыӈ Дальний Востокык нымэйӈыӄину китыӈ:

- ынкыеп титэ аму в’аямэтыӈ Пенжина, айгытӄыӈӄалыӈӄо, Анадыриӈӄо, галалай казако, то в’отӄойиӈ такъянӈыволай Охотский аӈӄайтыӈ.

- Коӈвоӈ Пенжина Колымский гычголванык, когалаӈнэн Ичигемский ӈэйив’в’ин, то кунумэкэв’ӈынин в’эемпиляӄу, кукетгутвиӈ.

- Пенжинский эмнуӈ - ныӄэялгыӄэн ваны. Алаал коӈво’ гынунык алайиг’илгык, то куплиткуӈ гынунык ӄайчейпыйиг’илгык. Тыттель ӈынвыӄ мыенылв’ын, г’ывынг’ылв’ын, пыг’оналв’ын. В’аямтайӈык Пенжина котвалаӈ ныквуӄинэв’ в’эпӄав’ Евразияк, накотвыӈвоӈын- пенжинакен. Ӈынвыӄ кайӈу, котвалаӈ г’игу. Ымычвилюйиг’илгык емэт куӄитыӈ нучельӄын. Ӈынвыӄ в’инвыпиляӄу яёлачгэн, кытгэмычгэн, ев’ъевин, милютэчгин, имъеӄчукинэв’.

- В’аямтайнык Пенжинак котвалаӈ в’уйву Аяӈкен, лиги нэкулӈыӈын ӄычвомкыкъет, Яёлкагиӈын, Кольпач, Апигин.

- Пенжина- ӈэйив’в’ыв’, тынупу, эмнуӈ, ӈынвыӄ гытгылв’ын то в’аямъяӈйыг’атгиӈылв’ын.

- В’эем Пенжина коӈтоӈ Охотский аӈӄайтыӈ.

Ыннеӈчеӈ елэг’уӈын ыннин митг’айин ваны, ӄыйим титэ ӄынтыгэват.

И. Оснач , камчаткакен калимитычг’ын, китыӈ иччетык Союзык калимитычг’ин Россияк.

Энаннимэв’нэн С. Тынанто.

Делитесь новостями Камчатки
в социальных сетях:

Свежие новости Камчатки, новости Петропавловска-Камчатского