2021 гэвэгиӈык ымыӈ этгиӈо социально-экономикакэн йиплэпав’гиӈэпыӈ айгытӄываятэн нэетэйкыӈнэв’ ымыӈ, эвыӈ С. Лебедев

18.11.2020 01:44:59 (GMT+12)

2021 гэвэгиӈык ымыӈ этгиӈо социально-экономикакэн йиплэпав’гиӈэпыӈ айгытӄываятэн нэетэйкыӈнэв’ ымыӈ, эвыӈ С. Лебедев

Яноткенав’ тайкыёв’ келлаӈ «Йиплэпав’гиӈо айгытӄываятэн Айгытӄыӈӄо, Сибириӈӄо то ДВ,юнэтылг’ин Камчаткак» региональный тайкыёлӄылэпыӈ «Яёг’ыӈгиӈо государственный национальный этгиӈэпыӈ тит йингычголавык томгылг’атгиӈо гамга ваятэн Камчатский крайик».

«2021 г. яёг’ыӈкы тайкыёлӄыло ганчоччымав’лэнав’ ӄымэк 70 миллионав’ пылв’ынто»,-эвыӈ С. Лебедев, пыче итылг’ын инэллэчг’у энаплэпав’гиӈэпыӈ Камчатский крайик. Ыннею в’аняво тывынэн гэтама краевой бюджет ӄотэн гэвэйтыӈ.

Ынно эвыӈ, ӄутин гивик ыппульг’ав’ нэентэг’итвэнӈынэв’ пылв’ынто в’утин тайкыёк, мыев’ нэечвиӈнэв’ йинплылв’ынтов’гиӈо ячвыӈчатгиӈэн г’ытг’ылг’ин «Берингиян». То ынняӄ ымоӈ социально- экономикакенав’ вэтгиӈо ымыльг’ыӈ нэетэйкыӈнэв’.

Пылв’ынтогиӈо ӄымек ымоӈ тайкыёлӄылэн наянпэланӈынав’ панэначг’энаӈ. Ыннею келлаӈ паӈав’ъейгиӈо санаторияк вэтатылг’ыйикыӈ ӄоявъепъиччетылв’ынык, тав’анныӈгиӈо айгытӄываятыӈ, ёнатылг’ыйикыӈ крайик, наркологический в’эннятгиӈо. Опта амъел нэейкуйикынэв’ нытуйӄинэв’ явэнаӈо яйгочав’ӈыэччатылв’ыныӈ, миӈки накончоччымав’ӈынав’ митычг’у вэтатык чененваяткечг’энаӈ. Наконкымг’ылэв’ӈывоӈнав’ чывипту вэлатгиӈо каличитылг’ыӈ гынункин то ынангычгол валг’эн ейгучев’ӈыиччетык. Наковэланӈывоӈнав’ йиг’это, миӈки коӈволаӈ ейгучев’ӈык айгытӄылг’о. То ымыӈ вэлатгиӈо йиг’этэпыӈ келлаӈ ягочав’ӈылг’ыйикыӈ Паланкэн колледжак, филиалык миӈки накончоччымав’ӈынав’ в’иннетычг’у инэнмэлэвылг’ин.

То этг’у ынан яноткен государственный в’эннятгиӈын пылв’ынтэпыӈ китыӈ яйичг’ыэччатыӈ айгытӄываятэн. В’отэнэпыӈ яйичг’ыиччетэ гэмэтгивик накойкойӈывоӈнав’ имы яӄ вэтатъявэнаӈо- г’ытву, дизель-генераторо, таяӈкэнав’ ымыӈ ею тит йиплэпавык, чининкинэв’ вано»,- эвыӈ С. Лебедев.

То этг’у ынно эвыӈ, 2021 гэвэгиӈык амъел явэталайкэ йинчоччымавык инэнгыюлэвылг’у айгытӄываятъеличг’энаӈ, то еллайкэ яйгочав’ӈыгиӈо йингычголавык метгиӈо итык инэнгыюлэвылг’у чененеличг’энаӈ «Теориян то методикан йигыёлав’гиӈэпыӈ чененъеличг’энаӈ айгытӄылг’у».

«Ыннин китыӈ яноткэн вэтгиӈын, тит амъел йингычголавык энангыёлав’гиӈо чененеличг’энаӈ. Ватӄэн чаткаёӈгиӈын китыӈ- яйтаӈык нэӈиньмыӄин культура айгытӄываятэн, юнэтылг’ин Камчаткак. Эмг’у ӄун амъел мыччэв’иннетикынэв’ фольклорный экспедицияв’. Мыев’ ычгынан нэкунг’уевэнӈынэв’ культуракэнав’ пыттоӈо айгытӄываятэн»,-эвыӈ С. Лебедев.

То 2021 гэвэгиӈэтыӈ нанчоччымав’нав’ 25 миллионав’ пылв’ынто, тит нэлэйвикынэв’ иччету, меӈиныйик накойилӈывоӈнав’ государственный в’эннятгиӈо. 2021 гэвэгиӈык ынниг’ан валг’о иччету ӈыячаӈ ялайвылаӈ гамга в’ойвэпыӈ Корякский округык то Соболевский районык.

2020 гэвэгиӈык пылв’ынтыв’эннятгиӈо субсидията эллай 8 муниципальный районыӈ то ӄутин в’ойвэтыӈ. Ымоӈ пылв’ынто эллай 5 миллионав’, в’утинэтэ яйичг’ыиччетэ накакменӈывоӈнав’ государственный в’эннятгиӈо.

В’уткекъйит эначгыпав’лай каличитылг’у губернаторэн то Инэллэиччэтин Камчатский крайик.

Эчгыпо йинчоччымав’нэн С. Тынанто.


Делитесь новостями Камчатки
в социальных сетях:

Свежие новости Камчатки, новости Петропавловска-Камчатского